Sími: 866-9600 - Stuðningssími: 866-9618 - Netfang: kraftur@kraftur.org

Neyðarsjóður

Neyðarsjóður Krafts var stofnaður á 15 ára afmæli Krafts þann 1.október 2014.  Haldnir voru styrktartónleikar í Hörpunni þann 17.september 2014 þar sem safnað var í Neyðarsjóð Krafts og ágóðinn af þeim voru um 2 milljónir króna sem runnu beint í Neyðarsjóðinn. Auk þess barst sjóðnum myndarlegt framlag frá Ástu Hallgrímsdóttur, fyrrum formanni Krafts og ekkju Atla Thoroddsen sem lést úr krabbameini.

Á meðan á veikindum hans stóð hélt hann úti bloggi um veikindi sín sem síðar varð tekið saman í bókina Dagbók rokkstjörnu sem kom út árið 2009. Bókin var seld og var það ósk Ástu að ágóðinn rynni til Neyðarsjóðs Krafts.
Á 15 ára afmæli Krafts ákvað stjórn félagsins að heiðra Ástu með að tilnefna hana verndara sjóðsins.

Neyðarsjóðnum er ætlað að styrkja ungt fólk sem greinst hefur með krabbamein og lent hefur í fjárhagslegum erfiðleikum vegna hækkandi greiðsluþátttöku þess í heilbrigðiskerfinu. Neyðarsjóðurinn er eingöngu ætlaður til að standa straum af læknis- og lyfjakostnaði. Neyðarsjóður Krafts er tilraunarverkefni til þess að mæta brýnni þörf hjá krabbameinsveiku ungu fólki. Það er von okkar að ekki verði lengi þörf fyrir slíkan sjóð enda teljum við það vera stjórnvalda að sjá til þess að allir geti nýtt sér heilbrigðisþjónustu á Íslandi án tillits til efnahags. Þegar íslenskir krabbameinssjúklingar standa jafnfætis öðrum nágrannaþjóðum hvað varðar greiðsluþátttöku, þá getum við lagt sjóðinn niður.

Úthlutun

Veitt verður úr sjóðnum tvisvar á ári, í apríl og í október. Umsóknarfrestur fyrir vorúthlutun er til og með 1. apríl en 1. október fyrir seinni úthlutun. Ekki er sótt um sérstaka upphæð heldur mun stjórn sjóðsins meta þörfina og ákveða styrkupphæð með tilliti til stöðu sjóðsins. Svar við umsóknum munu berast eigi síðar en sex vikum eftir að umsóknarfrestur rennur út.

Með styrkumsókn skal senda eftirtalin gögn:
a. Læknisvottorð þar sem fram kemur staðfesting á sjúkdómnum, hvenær hann greindist, og kvittanir og reikninga vegna læknis- og/eða lyfjakostnaðar.
b. Samantekt um fjárhagsstöðu (eignir, skuldir og tekjur), t.d. yfirlit þjónustufulltrúa banka. Skattaskýrsla síðasta almanaksárs.

Umsóknir, ásamt fylgiskjölum, skulu sendar í útprentuðu formi til Krafts, Skógarhlíð 8, 105, Reykjavík.

Reikningur neyðarsjóðsins

Ef þú vilt styrkja neyðarsjóð Krafts er hægt að leggja inn á reikning í Arion banka 322-13-303318, kennitala Krafts er 571199-3009.

 

Instagram#krafturcancer

© 2017 KRAFTUR
Hannað og kóðað af Vefgerðinni